4大魔兵 美职争雄

「魔性」继续入侵美职!新一季美职听朝又开锣喇,虽有韦拿、基奥云高等离开远赴亚洲养老,不过随着「C朗师弟」拿尼加入,联同原有嘅伊巴谦莫域、朗尼及「小猪」舒韦恩史迪加,4大昔日曼联球星聚首一堂,佢哋个个都唔係嚟Hea,呢场美职「红魔内战」势必风起云涌。

当上月奥兰多城宣布签入拿尼后,好多人都慨叹C朗仲打紧意甲同欧联,而呢位「C朗师弟」已经要去美职颐养天年,但你咪理,拿尼今季效力士砵亭,上阵24场有8球进帐,仲有货卖,依家佢只係32岁,应付美职可谓绰绰有馀。讲到呢4大红魔球星,最有资历梗係33岁嘅朗尼喇,佢效力曼联长达13年,同其他3人做过队友之馀,亦以253球成为红魔史上士哥王,虽然喺曼联生涯末期被嘲「月巴」,但佢上季加盟华盛顿联队即刻嚟料,短短半季就攻入12粒,带领原本东岸排下游嘅华联杀入季后赛,唔讲得笑。

与朗尼、拿尼效力曼联时赢过英超同欧联等锦标相比,34岁嘅舒韦恩史迪加嘅红魔生涯坚悽惨,首季伤多过踢,次季更畀时任主帅摩连奴贬落预备组,对于呢位2014年德国夺世盃功臣嚟讲,可谓奇耻大辱,之后「小猪」亦意兴阑珊,喺2017年3月转投芝加哥火燄,不过火燄战绩麻麻,上季于东岸排尾2,「小猪」又被迫改打唔擅长嘅中坚,表现自然大打折扣。

论到性格巨星,伊巴谦莫域一定有份,2016年佢以34岁之高龄加盟曼联,神奇地喺53场轰29球,协助红魔连夺社区盾、英联盃及欧霸盃「小3冠」。上年因自知未能重拾最佳状态,伊巴毅然离开欧洲,转投洛杉矶银河,并轰入22粒,当中不乏离门35码超级远射等高难度士哥,虽则未能闯入季后赛,依然力压朗尼当选美职最佳球员,就算有传AC米兰想搵佢回巢,呢位37岁神箭讲到明,喺银河仲有目标未完成,可见佢想征服美职嘅斗心。4大昔日曼联球星聚首美职,呢齣「红魔内战」不容错过。返回搜狐,查看更多

You May Also Like

More From Author

+ There are no comments

Add yours